Programa de Divulgación Ambiental
omo froito dos anos de experiencia na capacitación e na acción ambiental, Amabul vese na obriga de abrir o programa de divulgación ambiental AMABUL co gallo de sistematizar e compilar toda a información xerada no devir do tempo.
Co desenvolvemento deste programa, procuramos que toda aquela persoa que teña inquedanzas pedagóxico-ambientais ou preferencia pola acción ambiental, poida beneficiarse dos diferentes materiais editados pola nosa asociación.
Neste apartado poderás consultar e descargar de xeito libre todas os materiais publicados por Amabul nos últimos anos.
Exposicións
Exposición
Wood Wide Web, a rede que dá vida ao planeta
Os cogomelos son unha pequena e importantísima parte dun organismo maior chamado fungo que, oculto baixo os nosos pés, conecta e da vida aos ecosistemas a través dunha complexa rede social.
Ao igual que nas redes tecnolóxicas, gran parte transpórtase baixo terra, non por cable de fibra óptica senón a través dos fungos, provendo múltiples servizos ecosistémicos que resultan determinantes para a vida do planeta e o benestar da humanidade.
“Wood Wide Web, a rede que dá vida ao planeta” é unha exposición itinerante que trata sobor a importancia ambiental e ecolóxica dos cogomelos, procurando sensibilizar, educar e motivar cara a acción ambiental responsable no eido da conservación dos nosos bosques e dos nosos recursos micolóxicos.
Ver expo
Exposición
Unha ameaza chegada dun espazo exterior
Ano 2021, a humanidade viviu décadas aterrada pola posible invasión dun exército de guerreiros extraterrestres sen sequera reparar que os perigos reais sempre proceden do interior do seu planeta, mais… quen son esas marcianas que ameazan a nosa supervivencia?
Segundo o Atlas de Plantas Invasoras de España (2004), as invasións biolóxicas son o segundo problema ambiental por orde de magnitude que afecta á Biosfera, só por detrás da destrución de hábitats, á cal tamén contribúen as plantas exóticas invasoras (PEI).
“Unha ameaza chegada dun espazo exterior” é unha exposición itinerante, creada coa financiación da Deputación da Coruña, que trata a problemática da flora exótica invasora no curso medio dos ríos galegos, procurando sensibilizar, educar e motivar cara a acción ambiental responsable no eido das invasións biolóxicas provocadas pola flora alóctona.
Ver expoUnidades didácticas
UDA Flora exótica invasora
A flora exótica invasora no curso medio dos ríos galegos (2ª Edición)
A unidade didáctico ambiental (UDA) “A flora exótica invasora no curso medio dos ríos galegos” pretende ser unha ferramenta de educación e acción ambiental para o profesorado de secundaria e bacharelato e para outras/os profesionais da educación, colectivos asociativos e público xeral, que queiran realizar un achegamento didáctico-activo á problemática das plantas exóticas invasoras (PEI) nos ecosistemas fluviais.
Esta UDA xorde da preocupación da Asociación Medioambiental AMABUL polo deterioro ambiental e paisaxístico que, nos últimos anos están a sufrir os bosques de ribeira dos ríos galegos.
O que procuramos dende AMABUL con esta proposta é sensibilizar e capacitar para a acción ambiental, tomando como referentes pedagóxicos a educación ambiental, entendida como educación para e coa acción, e a interpretación ambiental, procurando un afondamento significativo na problemática das PEI.
Amais, gustaríanos que a metodoloxía proposta con este traballo sirva como guía para a elaboración e concreción doutras iniciativas para a aprendizaxe, sensibilización e capacitación ambiental.
Trátase dunha publicación financiada pola Deputación da Coruña.
UDA Cogomelos
Os cogomelos como recurso ambiental e pedagóxico
A unidade didáctico ambiental (UDA) “Os cogomelos como recurso ambiental e pedagóxico” pretende ser unha ferramenta de educación e acción ambiental para o profesorado de secundaria e bacharelato da nosa comunidade autónoma e para outras persoas profesionais da educación, colectivos asociativos e público xeral, que queiran realizar un achegamento didáctico-activo ao mundo dos cogomelos.
Esta UDA xorde do interese da Asociación Medioambiental AMABUL pola conservación ambiental e pola necesidade de educar por e para ela, entendendo o recurso “cogomelos” como piar fundamental para o benestar dos nosos ecosistemas e por tanto, para a nosa saúde.
O que procuramos dende AMABUL con esta proposta, financiada pola Deputación da Coruña, é sensibilizar sobor a importancia da preservación dos nosos micelios ao tempo que procuramos capacitar para o estudo, análise e identificación de especies micolóxicas, despregando para elo o Método “hábitats, cores e formas” (HCF), que con esta publicación se presenta.
Amais, gustaríanos que o Método HCF proposto nesta publicación sirva como guía para a elaboración e concreción doutras iniciativas para a aprendizaxe, sensibilización e capacitación ambiental no eido da micoloxía.
DescargarOutras publicacións
Revista Humor Ambiental
Humor Gráfico Ambiental
Esta publicación sobor Humor gráfico ambiental procura ser unha ferramenta de senbilización ambiental arredor das problemáticas ambientais que asolagan á nosa comunidade.
Xorde como produto do Curso de humor gráfico ambiental desenvolto por AMABUL no outono de 2021, dirixido por Kiko da Silva e financiado pola Deputación de A Coruña.
Esta pequena publicación, deseñada e impresa coa colaboración da Deputación da Coruña, tamén nace co obxectivo de servir como instrumento didáctico ás persoas que se dedican á educación ambiental.
Aquelas persoas interesadas poden descargalo ou solicitar un exemplar enviando un correo a divulgacion@amabul.org.
DescargarXogos
Xogo para educación secundaria
Xogo “Wood Wide Web Quizz”
Co “Wood Wide Web Quizz” procuramos que o alumnado de educación secundaria descubra, dun xeito lúdico, esta peculiar “rede que dá vida ao planeta”.
Está composto por un taboleiro, 6 cogo-fichas, 6 cestos-recolleita, 36 cogomelos-recompensa, 50 preguntas-choupín, 30 preguntas-cantarela e 20 preguntas-amanita, para que o alumnado descubra o mundo dos fungos e a súa importancia ecosistémica.
Trátase dun xogo realizado coa financiación da Deputación da Coruña.
Descargar
Xogo para educación primaria
Xogo “Memory Wood Wide Web”
Co “Memory Wood Wide Web” procuramos que o alumnado de educación primaria realice un achegamento lúdico á importancia ecolóxica dos fungos.
Está formado por un taboleiro e 36 fichas dos servizos ecosistémicos que promoven os fungos para que o alumnado descubra como contribúen a conservar e mellorar a contorna.
Trátase dun xogo realizado coa financiación da Deputación da Coruña.
Descargar
Xogo para educación secundaria
Xogo relaciona, unha ameaza chegada dun espazo exterior
Co “Xogo relaciona, unha ameaza chegada dun espazo exterior” procuramos que o alumnado de educación secundaria descubra, dun xeito lúdico, a problemática da flora exótica invasora.
Está composto por un taboleiro, 42 fichas de relación (incluídas 8 fakes) e 8 tics de resposta correcta, para que o alumnado relacione conceptos relativas á flora exòtica invasora.
Xogo realizado coa financiación da Deputación da Coruña.
Descargar
Xogo para educación primaria
Crebacabezas, unha ameaza chegada dun espazo exterior
Cos “Crebacabezas, unha ameaza chegada dun espazo exterior” procuramos que o alumnado de educación primaria realice un achegamento lúdico á problemática da flora exótica invasora.
Está formado por cinco crebacabezas distintos (árbores, acuáticas, zoócoras, rizomáticas e especiais) para que o alumnado descubra as principais especies de flora exótica que invaden o curso medio dos nosos ríos.
Xogo realizado coa financiación da Deputación da Coruña.
DescargarAs últimas novas do Programa de Divulgación Ambiental
ESCOLA AMBIENTAL AMABUL SETEMBRO 2024
Continuamos a Escola Ambiental coa proposta para o mes de setembro: Plumas no vento.
Descubriremos o mundo das aves a través da exploración e o xogo. Aprenderás sobre as adaptacións destes animais ao medio no …
ESCOLA AMBIENTAL AMABUL FEBREIRO 2024
Continuamos a Escola Ambiental coa proposta para o mes de febreiro: Os bosques están en perigo.
Seguiremos descubrindo a biodiversidade dos nosos bosques e aprenderemos a recoñecer algúns dos sons que emiten as aves, insectos …
ESCOLA AMBIENTAL AMABUL XANEIRO 2024
Continuamos a Escola Ambiental coa proposta para o mes de xaneiro: O mundo que nos rodea.
Unha actividade coa que aprender sobre a biodiversidade que nos rodea, a cal nos vai permitir descubrir as variadas …
