Proxecto Luz

proxecto LUZ explora as potencialidades das actividades relacionadas coa posta en valor da riqueza ambiental da ZEC Sistema fluvial Ulla-Deza no medio rural co fin de facer realidade o intercambio de talento xuvenil-sénior cara o impulso de novas iniciativas no eido da identificación e difusión da riqueza ambiental (bosques e fungos) da ZEC.

A parella interxeracional deste proxecto compóñena Mónica e Irimia.

Mónica ten 60 anos e a súa paixón dende pequena foi o bosque e os fungos sendo sempre consciente da importancia da súa conservación e do valor que ten transmitir a súa riqueza para tal fin.

Irimia ten 23 anos e dende fai pouco é bióloga, apaixónalle o rural, a micoloxía e a educación, polo que é moi consciente de que a conxunción destes tres eixes ofrece  unha grande oportunidade para o desenvolvemento do seu futuro profesional.

Durante os meses de maio a outubro de 2025, Mónica e Irimia desenvolveron diferentes accións formativas, capacitadoras, colaborativas e de extensión voluntaria co obxectivo de impulsar unha idea de emprendemento concreta no medio rural no marco da conservación e recuperación de ecosistemas: a creación dun breakouteducativo arredor da micoloxía, para alumnado de educación infantil, primaria e secundaria.

Neste tempo 186 persoas puideron participar directamente no proxecto LUZ a través das súas actividades de extensión voluntaria e de presentación da iniciativa piloto; o custe total do proxecto foi de 4.622,57 € dos cales 4.153,77 € foron financiados pola Unión Europea a través dos fondos NextGenerationEU do Plan de recuperación, transformación e resiliencia.