Proxecto Lume

proxecto LUME explora as potencialidades das actividades secundarias no sector agroalimentario (cultivos ecolóxicos e sustentables) co fin de facer realidade o intercambio de talento xuvenil-sénior cara o impulso de novas iniciativas no eido da transformación e comercialización agroalimentaria.

A parella interxeracional deste proxecto compóñena Maruja e Fátima.

Maruja ten 73 anos e sempre se dedicou ao coidado da súa casa, da súa horta e sobre todo… das súas xentes, co cal desenvolveu un sentido especial para coidar o seu padal empregando o lume para cociñar os produtos da súa terra.

Fa ten 30 anos e dedícase á restauración na aldea, mais é consciente que son tempos de renovarse, reinventarse e emprender para evitar que o despoboamento no rural leve por diante o traballo dos últimos anos.

Durante os meses de maio a outubro de 2025, Maruja e Fátima desenvolveron diferentes accións formativas, capacitadoras, colaborativas e de extensión voluntaria co obxectivo de impulsar unha idea de emprendemento concreta no medio rural no marco do sector agroalimentario: a creación dun servizo de “Catering da avoa”,iniciativa que ofrece un catálogo de tapas en liña pensadas para servir en bares e tabernas; a través da web, os establecementos poden realizar o seu pedido de tapas elaboradas con produtos de tempada e locais, da horta ecolóxica do Val do Ulla.

Neste tempo 183 persoas puideron participar directamente no proxecto LUME a través das súas actividades de extensión voluntaria e de presentación da iniciativa piloto; o custe total do proxecto foi de 4.366,91 € dos cales 3.924,03 € foron financiados pola Unión Europea a través dos fondos NextGenerationEU do Plan de recuperación, transformación e resiliencia.