Proxecto Pau

proxecto PAU explora as potencialidades do oficio tradicional de cesteira/o no medio rural co fin de facer realidade o intercambio de talento xuvenil-sénior cara o impulso de novas iniciativas no eido cultural e turístico.

A parella interxeracional deste proxecto compóñena Carmen e Sarai.

Carmen ten 74 anos e está fondamente ligada ao rural e aos oficios tradicionais que del nacen. Convencida do valor da cestería como parte do noso patrimonio cultural e turístico, ve nas fibras naturais e na súa recolla sostible unha oportunidade para coidar o territorio e manter vivo un saber que forma parte da identidade galega.

Sarai ten 31 anos e unha sensibilidade especial polos recursos que ofrece a terra e polo valor dos oficios tradicionais. A cestería esperta nela curiosidade e respecto, ao descubrir como a xestión sostible das fibras naturais pode abrir camiños para novos modos de vida e traballo que conectan creatividade, cultura, turismo e futuro.

Durante os meses de xaneiro a maio de 2026, Carmen e Sarai desenvolveron diferentes accións formativas, capacitadoras, colaborativas e de extensión voluntaria co obxectivo de impulsar unha idea de emprendemento concreta no medio rural no marco da conservación e recuperación de ecosistemas: a creación da iniciativa “Vimbiose”, un espazo de convivencia, formación e produción sostible arredor das vimbieiras e o oficio da cestería, que fomenta a conexión coa natureza e alternativas máis ecolóxicas e autónomas fronte ao consumo actual.

Neste tempo 171 persoas puideron participar directamente no proxecto PAU a través das súas actividades de extensión voluntaria e de presentación da iniciativa piloto; o custe total do proxecto foi de 9.961,24 € dos cales 9.079,35 € foron financiados pola Unión Europea a través dos fondos NextGenerationEU do Plan de recuperación, transformación e resiliencia.