Nova xornada de voluntariado ambiental ERRADICADESCANTIA
Amabul, a través dos seus grupos de voluntariado, leva traballado neste 2021 en máis de 400 metros cadrados da ZEC Sistema fluvial Ulla-Deza, eliminando preto de 3 toneladas da herba da fortuna (Tradescantia fluminensis) das ribeiras do río Ulla.
Este labor voluntario é moi necesario, máis se cabe nun espazo protexido por Rede Natura 2000, para facilitar que o bosque autóctono de ribeira poida rexenerarse de xeito natural con especies autóctonas como o carballo, o freixo ou o amieiro.
Mais esta debe ser unha tarefa concienciuda, meticulosa e sobor todo constante, por iso dende Amabul realizamos estas xornadas con certa periodicidade.
Neste ano queremos chegar a limpar 500 metros cadrados… queres axudar ao bosque de ribeira do Ulla a conseguir este obxectivo? Apúntate á seguinte acción do Erradicadescantia que será…
DATA E LOCALIZACIÓN
Sábado 20 de novembro de 2021 ás 9:15h
Área Recreativa de Agronovo (Vedra)
REQUIRIMENTOS
Poderá participar calquera persoa de calquera idade con interese na mellora da contorna.
Por mor dos protocolos COVID recoméndase que o voluntariado veña provisto das súas propias luvas.
PROGRAMA DA XORNADA
9:15h Recepción do Voluntariado
9:30h Formación do Voluntariado
10:00h Labores de Erradicación I
12:00h Almorzo con Amabul
12:30h Labores de Erradicación II
14:00h Fin da Xornada
As persoas interesadas recibirán formación inicial sobor metodoloxías de eliminación e control de flora exótica invasora, estarán cubertas polos seguros correspondentes, recibirán as ferramentas necesarias para o labor ambiental e terán dereito a solicitar certificado do seu labor voluntario.
Se xa estás decidida/o a axudar ao bosque de ribeira, cubre o seguinte formulario ANTES DO 15 DE NOVEMBRO cos teus datos e agarda que nos poñamos en contacto contigo; se tes calquera dúbida tamén podes enviarnos un correo a accion@amabul.org